Asia/Africa

Трамп-Кимийн уулзалт Монголд болох магадлал хамгийн өндөр

Politik.mn 29 үзсэн1

Өнгөрсөн Баасан гарагт болж өнгөрсөн хоёр Солонгосын дээд хэмжээний уулзалтын маргаашнаас Трамп-Кимийн түүхэн уулзалтын тухай мэдээлэл эрчимтэй хөвөрч эхэллээ.

Ким Жон Унтай уулзсаныхаа маргааш өглөө орон нутгийн цагаар 9:15 цагт Өмнөд Солонгосын ерөнхийлөгч Мүүн Жэ Ин АНУ-ын ерөнхийлөгч Дональд Трамптай утсаар ер бусын удаан ярилцсан байна. Тэдний яриа 75 минут үргэлжилсэн бөгөөд хамгийн сүүлд арванхоёрдугаар сарын 1-нд Хойд Солонгос алсын тусгалын баллистик пуужин туршсаны дараа ярихдаа ч ингэж удаан ярилцаагүй гэнэ.

Энэ үеэр Мүүн Жэ Ин АНУ-Хойд Солонгосын уулзалт болох газрыг Ким Жон Унтай тохирсноо АНУ-ын ерөнхийлөгчид дуулгасан байна. Сөүлийн албаныхан Мүүний санал болгосон газрыг мэдээлэх боломжгүй гэж хэвлэлийнхэнд мэдэгдсэн ба Вашингтоны тал тун ойрын үед уулзах газрыг зарлах төлөвтэй байгаа талаар ам алджээ.

Мөн хугацааны хувьд төсөөлж байснаас эрт уг уулзалт болох шинж ажиглагдаж эхэлсэн байна. Тухайлбал өнгөрсөн амралтын өдрүүдэд Мичиганд ажилласан Дональд Трамп дэмжигчдийнхээ өмнө үг хэлэхдээ Ким Жон Унтай “гурваас дөрвөн долоо хоногийн дараа” уулзана гэж ярьжээ.

Өмнө нь тэр тавдугаар сарын сүүл, зургаадугаар сарын эхээр уулзалт болно гэж мэдэгдэж байв.

Уулзалт болох газраар хоёр хувилбар шалгарч үлдээд байгааг Трамп Баасан гарагт Германы канцлерьтай хамтарсан хэвлэлийн хурлын үеэр мэдэгдсэн бол маргааш нь эдгээр хоёр газар нь Монгол, Сингапур улсууд болохыг CBS News суваг албаны хоёр тусдаа эх сурвалжаас тодруулснаа мэдээлсэн юм.

Тэгвэл Монголд уулзалт болох уу?

АНУ-ын Ерөнхийлөгч Дональд Трамп, Умард Солонгосын удирдагч Ким Жөн Ун нарын ирэх сарын сүүлчээр эсвэл зургадугаар сарын эхээр хийхээр төлөвлөж буй дээд хэмжээний уулзалт Монголд болох магадлал хамгийн өндөр байна гэж Сөүл болон Москвагийн дипломат эх сурвалжууд Оросын “Известия” сонинд ярилцлага өгөхдөө хэлсэн байна гэж  “ТАСС” агентлаг мэдээлэв.

АНУ болон Умард Солонгосын аль алинтай нь адил тэгш найрсаг харилцаатайгаас гадна техникийн шалтгаануудтай холбоотойгоор энэ түүхэн уулзалт Монгол болох магадлал хамгийн өндөр байна гэж “Известия” сонинд бичсэн байна.
Шинжээчид хэлэхдээ “Пхеньяны хуучны агаарын хөлгийн хүчин чадлын улмаас Швед, Швейцарь зэрэг Европын орнууд энэ уулзалтыг зохион байгуулах магадлалтай гэгдэж байсан газруудын жагсаалтаас хасагдсан” гэжээ.
Сөүл дэх Кукмины их сургуулийн шинжээч Андрей Ланков ярихдаа “Трамп-Кимийн уулзалт болох магадлалтай гэгдэж байсан газрууд хэдийн эхнээсээ хасагдсан. Одоо энэ уулзалт болох хамгийн өндөр магадлалтай газар нь Монгол болж үлдээд байна. Америкчууд энэ уулзалтыг Хятад болон Орост зохион байгуулахыг хүсэхгүй нь мэдээж. Ким Жөн Ун хятадуудад найр тавьж байгаа хэдий ч дээд хэмжээний уулзалтыг Хятадад зохион байгуулахыг хэзээ ч хүсэхгүй” гэжээ. Тэрбээр цааш нь ярихдаа “Трамп-Кимийн уулзалтыг зохион байгуулах магадлалтай гэгдэж байсан газруудын тооноос Хойд Европын орнууд хасагдсан нь цэвэр техникийн шалтгаантай холбоотой. Зөвлөлтийн үед хамаарах Пхеньяны нисэх онгоцууд зогсолтгүйгээр Европт хүрэх боломжгүй” гэсэн байна.
Мөн ОХУ-ын ШУА-ийн Дорно дахин судлалын хүрээлэнгийн Солонгос болон Монгол судлалын тэнхмийн эрхлэгч Александр Ворентсов хэлэхдээ “Ложистик болоод улс төрийн хүчин зүйлийн аль алиных нь  үүднээс авч үзвэл энэ уулзалт Монголд болох магадлал хамгийн өндөр байна. Монгол Улс  Умард Солонгостой холбоотой асуудлыг шийдвэрлэхэд “зууч”-ийн үүрэг гүйцэтгэхийг хэзээнээс эрмэлзсээр ирсэн. Тэгээд ч Монгол бол Пхеньян, Вашингтон болон Сөүлийн аль алинтай нь хэвийн харилцаатай цөөн хэдэн улсын нэг” гэсэн байна.
Сөүлийн нэгэн нөлөө бүхий дипломатч мөн хэлэхдээ “Энэ уулзалт Монголд болох магадлал маш өндөр байна. Д.Трамп дотоод асуудалтай холбоотой шалтгаануудын улмаас Пхеньян руу явахгүй. Ким ч Сөүл рүү явахгүй” гэжээ

Сэтгэгдэл (1)

  1. I simply want to tell you that I am beginner to blogging and site-building and truly enjoyed you’re web blog. Probably I’m planning to bookmark your site . You certainly have excellent articles. Thanks for sharing your website page.

Сэтгэгдэл үлдээх