Post

Монгол Улсын Ерөнхийлөгч Х.Баттулгад Бүгд Найрамдах Энэтхэг улсын Гадаад хэргийн сайд Сушма Свараж бараалхлаа

Politik.mn 15 үзсэн2

Монгол Улсын Гадаад харилцааны сайд Д.Цогтбаатарын урилгаар Монгол Улсад албан ёсны айлчлал хийж байгаа Бүгд Найрамдах Энэтхэг Улсын Гадаад хэргийн сайд Сушма Свараж өнөөдөр Монгол Улсын Ерөнхийлөгч Х.Баттулгад бараалхлаа.

Монгол Улсын Ерөнхийлөгч Х.Баттулга хатагтай Сушма Сваражийг Монгол Улсад албан ёсны айлчлал хийж байгаад нь баяр хүргээд, хоёр улсын хамтын ажиллагааг дээд түвшинд ойртуулсан ихээхэн үр дүнтэй айлчлал болж байгаа гэдэгт итгэлтэй байгаагаа илэрхийллээ.

Бүгд Найрамдах Энэтхэг Улсын Гадаад хэргийн сайд Сушма Свараж Монгол Улсад ирсэндээ сэтгэл их өндөр байна, албан ёсны айлчлалынхаа хүрээнд Монгол Улсын Ерөнхийлөгч, Ерөнхий сайд, УИХ-ын дарга нарт бараалхаж, хоёр улсын хамтын ажиллагааны талаар ихээхэн үр дүнтэй яриа хэлэлцээр хийж чадлаа хэмээн онцлов. Мөн тус улстай хамтран хэрэгжүүлэх гэж байгаа нефть боловсруулах үйлдвэр Монгол Улсын хувьд шатахууны хараат байдлаас гарахад хэчнээн чухал болохыг ойлгож ихээхэн анхаарал хандуулж байгаа хэмээлээ.

Монгол Улсын Ерөнхийлөгч Х.Баттулга БНЭУ-тай түүх, соёл, шашны хувьд хамтын ажиллагаа сайн хөгжиж байгааг онцлоод, цаашдаа эдийн засгийн харилцааг хөгжүүлэх сонирхолтой байгаагаа илэрхийлсэн юм. Мөн БНЭУ-ын Ерөнхийлөгч, Ерөнхий сайд нарт өөрийнхөө мэндчилгээг дамжуулахыг тус улсын Гадаад хэргийн сайдаас хүслээ.

Талууд хоёр улсын хамтын ажиллагааны цаашдын хөгжилд анхаарч, бүхий л салбарт хамтын ажиллагааг үр дүнтэй хөгжүүлэх талаар санал солилцож ярилцлаа.

Мэдээний дүрсийг хүлээн авч үзнэ үү:

Сэтгэгдэл (2)

  1. I just want to say I’m beginner to blogging and site-building and certainly liked you’re blog. More than likely I’m planning to bookmark your site . You certainly have fantastic stories. Regards for revealing your blog site.

Сэтгэгдэл үлдээх