Asia/Africa

Пак Кын Хэд шүүхээс 24 жилийн ял оноолоо

Politik.mn 32 үзсэн0

БНСУ-ын Сөүл хотын төв дүүргийн шүүх ерөнхийлөгч асан Пак Гын Хэгийн авлига, албан тушаалаа урвуулан ашигласан хэргийг хэлэлцээд түүнд 24 жилийн хорих ял оноожээ. Шүүх хурлыг телевизээр шууд дамжуулан хүргэж байгаа бөгөөд шүүхийн шүүгч ялын тогтоолыг танилцуулсан.

2016 оны 10 сард Пак Гын-Хе багын найз Чой Сүн-Шилийнхээ үгээр төрийн олон хэргийг шийдэж байсан баримт, мэдээлэл бүхий ipad олдож хэвлэл мэдээллийнхэнд хүрснээр Ерөнхийлөгч эмэгтэйг огцруулах олон нийтийн эсэргүүцэл эхэлсэн юм.  Хоёр сарын турш Солонгосын олон нийт 1-2 сая хүний эсэргүүцлийн жагсаалыг удаа дараа хийж үүний хариуд Пак Гын-Хе хоёр ч удаа уучлал гуйсан ч нэмэр болоогүй. Олон нийт түүнийг шууд огцрохыг шаардаж байв.

Эцэстээ аргагүйд хүрсэн Пак Гын-Хе гол шийдвэрийг Үндэсний Ассамблей шийдэг гэсэн мэдэгдлийг хийснээр 2016 оны 12 сарын 9-нд Солонгосын Үндэсний Ассамблей Ерөнхийлөгчөө огцруулах санал хураалт явуулж 300 гишүүнээс 234 нь дэмжсэнээр албан тушаалаас нь түдгэлзүүлсэн. Улмаар мөрдөн байцаалтын явцад Пак Гын Хэг бизнесийн магнатуудаас авлига авсныг баттай тогтоож, албан тушаалаас нь огцруулж, урьдчилан хорих төвд хорьж байсан билээ.

БНСУ-ын прокурорууд түүнийг томоохон бизнес эрхлэгчдээс олон сая ам.долларын хахууль авсан 18 хэргийг шалгаж, түүнд 30 жил шоронд хорих ял төлөвлөсөн. Пак Кын Хэгийн талаас олон шалтаг шалтгаанаар шүүх хуралд оролцохоос татгалзаж, шүүх хурлыг хойшлуулж байсан ба өнөөдөр ийнхүү шүүх бүрэлдэхүүн шийдвэрээ гаргаж байгаа юм.

Ямар нэг байдлаар түүний ялыг хөнгөвчлөхгүй бол өдгөө 66 настай Пак Кын Хэ 90 настайдаа шоронгоос суллагдах ажээ.

Сэтгэгдэл үлдээх